Kosova po shënon një hap të rëndësishëm në rrugën e saj drejt promovimit ndërkombëtar të prodhimeve të saj bujqësore, duke marrë pjesë për herë të parë në një nga panairet më të mëdha të Evropës, Fruit Attraction në Madrid. Ky panair, i njohur për promovimin e prodhimeve më të mira të frutave dhe perimeve në botë, është një mundësi ideale për prezantimin e mjedrës dhe boronicës së freskët të Kosovës.
Pjesëmarrja e Kosovës në këtë panair është një mundësi e jashtëzakonshme për të ndërtuar ura bashkëpunimi me tregun spanjoll. Cikli i prodhimit të boronicës dhe mjedrës në Kosovë fillon menjëherë pasi përfundon sezoni i tyre në Spanjë, duke e bërë Kosovën një partner të vlefshëm për plotësimin e kërkesave të tregut evropian në periudha strategjike.
Në panair, shumë takime dhe diskutime të frytshme janë zhvilluar me përfaqësues të industrisë së pemëve të imëta, duke hapur rrugën për projekte bashkëpunimi në të ardhmen. Kompanitë kosovare që prezantuan në panair ishin:
- Berrykode
- BeatBerry
- JoniSH
- Agrium
- Natyral Fruits
- Kemi Fruits
- AgroFruit
- Red Gold
- Sharr Berry
- Mjedra e Kosoves
- BluePearl
- SanteFruit
Kultivimi i mjedrës dhe boronicës në Kosovë ka njohur një zhvillim të shpejtë, duke e bërë vendin një aktor të rëndësishëm në këtë industri. Klima dhe kushtet natyrore të Kosovës e bëjnë atë një rajon ideal për kultivimin e këtyre kulturave, dhe pjesëmarrja në panaire të këtij niveli ndihmon në rritjen e njohjes së prodhimeve kosovare në tregjet evropiane.
Kosova është e përkushtuar për të vazhduar investimet në këtë sektor dhe për të krijuar partneritete të reja ndërkombëtare, duke shfrytëzuar potencialin e saj bujqësor për të ofruar produkte të freskëta dhe cilësore për tregjet globale.