Më 27 gusht 2026, në Prizren do të organizohet edicioni i tretë i aktivitetit “Dita e Aronisë Organike”, një ngjarje e dedikuar promovimit të aronisë si një kulturë me vlera të larta ushqyese, potencial ekonomik dhe rëndësi për zhvillimin e prodhimit të qëndrueshëm në Kosovë.
Ky aktivitet organizohet nga Shoqata Nacionale “Mjedra e Kosovës” dhe Shoqata Organika, në bashkëpunim dhe me mbështetjen e kompanive ArtiFruit & Aronica, të cilat janë ndër prodhuesit kryesorë të aronisë në vend dhe një shembull i mirë i zhvillimit të prodhimit modern dhe të qëndrueshëm.
Aktiviteti do të mbahet në pemishten më të madhe të aronisë në Kosovë, në Prizren, ku ArtiFruit & Aronica kultivojnë rreth 8 hektarë me aroni, duke zbatuar praktika moderne të prodhimit dhe duke synuar standarde të larta të cilësisë dhe sigurisë ushqimore.
“Dita e Aronisë Organike” synon të krijojë një platformë për fermerët, përpunuesit, ekspertët, institucionet dhe akterët e tjerë të sektorit, për të shkëmbyer përvoja, njohuri dhe praktika të mira në kultivimin, përpunimin dhe promovimin e produkteve nga aronia.
Qëllimet kryesore të aktivitetit janë:
- Promovimi i aronisë si një frut me vlera të larta ushqyese dhe potencial të madh në treg;
- Ngritja e vetëdijes për rëndësinë e prodhimit organik dhe të qëndrueshëm;
- Shkëmbimi i përvojave mes fermerëve, ekspertëve dhe përpunuesve;
- Prezantimi i praktikave moderne të kultivimit dhe përpunimit;
- Rritja e vlerës së produkteve vendore dhe krijimi i mundësive të reja për zhvillimin e sektorit të frutave alternative në Kosovë.
Përmes këtij aktiviteti synohet që aronia të promovohet më tej si një kulturë me perspektivë për fermerët kosovarë, duke kontribuar në diversifikimin e prodhimit bujqësor dhe në zhvillimin e ekonomisë rurale.
📅 Data: 27 Gusht 2026
⏰ Ora: 10:00
📍 Vendi: Prizren – ArtiFruit & Aronica
Të gjithë fermerët, ekspertët, përpunuesit dhe të interesuarit ftohen të jenë pjesë e kësaj dite të veçantë kushtuar aronisë organike dhe zhvillimit të kulturave alternative në Kosovë.
